Me një fond prej rreth 177 milionë lekësh nga të ardhurat e Bashkisë, kanë nisur sot punimet për rikonstruksionin e infrastrukturës në Bllokun e banimit nr. 22, kufizuar nga ”Rruga e Kavajës” – ”Muhamet Gjollesha” – Bulevardi ”Zhan d’Ark” dhe rruga ”Irfan Tomini”, ndërkohë që afati i përfundimit të punimeve për rehabilitimin e këtij blloku është 13 muaj.

Blloku 22 ndodhet në pjesën perëndimore të qytetit të Tiranës dhe kufizohet nga: rruga e “Kavajës” në pjesën Veriperëndimore, rruga “Muhamet Gjollesha” në pjesën lindore, Bulevardi ”Zhan D’Ark” në pjesën jugore dhe “Irfan Tomini” në pjesën perëndimore.

Kryetari i Bashkisë Edi Rama me këtë rast, është prononcuar për mediat e pranishme duke theksuar se: “Duke hapur një tjetër kantier në 22 hektarët e këtj blloku që i shtohen dhjetëra e dhjetëra hektarëve që do të marrin formë duke i dhënë një cilësi të re urbane këtë vit blloqeve të banimit, unë dua t’i bëj një apel Kryeministrit që të mos bredhë nëpër Shqipëri për të inaguaruar punë komunale që janë punët e kryetarëve të bashkive të komunave, për të larë apo duke u përpjekur më kot për të larë duart nga problemet reale me të cilat ai duhet të merret, pasi është koha që Kryeministri të japë llogari për krizën e rëndë të çmimeve, për krizën e rëndë të prodhimit, për krizën e rëndë të papunësisë; është koha që ai të japë llogari për krizën e rëndë të shërbimeve në drita, në ujë, në shëndetësi, në arsim. Këto janë punët e Kryeministrit dhe jo bredhjet nëpër komuna për të përvetësuar punët komunale.

Fillimi i punës tek Blloku 22