Kryetari i Partisë Socialdemokrate, Skënder Gjinushi, u shpreh gjatë një konference për shtyp, se zgjidhja e vetme e situatës politike në vend janë zgjedhjet e parakohshme.
Gjinushi deklaroi, se opozita reale duhet t’i përgjigjet votës së 18 shkurtit dhe e vetmja zgjidhje për nxjerrjen e vendit nga kriza janë zgjedhjet e parakohshme.

Kryeministri Sali Berisha u shpreh se negociatat për reformën zgjedhore duhet të nisin sa më shpejt.
Gjatë një konference për shtyp, duke iu përgjigjur interesimit të gazetarëve, Berisha tha se zoti Topi ka bërë propozimin dhe mendoj se negociatat duhet të nisin sa më shpejt.
Ka mundësi edhe këtë javë që vjen të ndërmerren hapat e përbashkëta dhe të instalohet komisioni përkatës. Fakti se ne jemi të gatshëm të pranojmë çdo lloj sistemi zgjedhor që do të propozojë opozita, përbën një bazë shumë të mirë për gjetjen e konsensusit, tha zoti Berisha.

Kryetari i Partisë Socialiste, Edi Rama, u shpreh gjatë takimeve të zhvilluara me anëtarësinë e kësaj partie në Kuçovë dhe Berat se PS nuk është muzeum, por një qënie e gjallë, është një parti që jeton për të ardhmen, parti që duhet të jetojë me kohën dhe si një parti e tillë do të ketë mbështetjen e anëtarëve të saj, të cilët në këto vite i kanë dhënë gjithçka.
Duke vlerësuar funksionimin e degës së PS-së në qytetin e Kuçovës, zoti Rama tha se kjo parti është për t'u bërë shembull dhe për PS në qendër, pasi e ka vërtetuar se është në pozitat e duhura brenda të cilës ekziston konkurrenca, por jo lufta e bërrylave, frymë kjo që duhet të përfshijë gjithë PS.